Opozita është kundër nismës së qeverisë për shkarkimin e Kryeprokurorit Lupço Kocevski. LSDM konsideron se kjo është një përpjekje për partizanizimin e gjyqësorit, në vend të reformave reale në sistemin e drejtësisë.

“Unë besoj se njoftimet e qeverisë për të ndërhyrë në fushën e ndryshimit të anëtarëve të Këshillit Gjyqësor, një nismë për zëvendësimin e prokurorit publik, nuk janë absolutisht reformë, por tentativë për partizim të sistemit. Ka strategji të qartë në planin e rritjes, të cilën qeveria jonë e LSDM-së po e përgatiste, kjo qeveri e VMRO-DPMNE-së kryeministrin e nënshkroi në Bruksel, që përcakton qartë udhërrëfyesin që duhet ndjekur në agjendën evropiane”, deklaroi Venko Filipçe, kryetar i LSDM-së.

Nga ana tjetër VMRO-DPMNE-ja vazhdon të kërkojë shkarkimin e Kocevskit, me arsyetimin se po mbron krimet e pushtetit të kaluar.

“Lupço Kocevski si kryeprokuror ka heshtur ndërsa LSD ka vjedhur institucionet. Tani që Kocevskit iu dha liria për të vepruar dhe përkrahja e plotë nga institucionet, ai u përpoq në çdo mënyrë që ta zvarrisë procedurën. Maqedonia meriton prokuror që do të punojë në interes të qytetarëve të saj. Kryeprokurori duhet të jetë njeri me integritet, jo i dëgjueshëm”, u shpreh Brane Petrushevski, deputet i VMRO-DPMNE-së.

Qeveria kërkon shkarkimin e Kocevskit për shkak se sipas saj në mënyrë të kundërligjshme ka emëruar shef në krye të Prokurorisë së Lartë Publike të Shkupit, ndërsa procedura disiplinore ndaj ish-kryetarit, Mustafa Hajrullahi është ende në vazhdim e sipër. Kocevski përmes një publikimi me shkrim është përgjigjur se ka vepruar ligjërisht dhe se kështu ka qenë edhe në këtë rast. Propozimi i Qeverisë për shkarkimin e tij në Ministrinë e Drejtësisë do t’i përcillet Këshillit të Prokurorëve Publikë dhe më pas do të jetë për votim para deputetëve. Kocevski në krye të Prokurorisë erdhi një vit më parë, pas pensionimit të paraardhësit të tij, Lubomir Jovevski. Ai ka edhe pesë vite mandat në këtë detyrë. /Alsat.mk