Tetovë | Tetova1 – Shefi i ri i NATO-s, Mark Rutte, ka dhënë një paralajmërim të fortë për një skenar të rrezikshëm që mund të çojë në shpërthimin e një konflikti global. Sipas tij, ekziston një rrezik real që Kina dhe Rusia të bashkërendojnë veprimet ushtarake në mënyrë të sinkronizuar, duke nisur një ofensivë të dyfishtë ndaj Perëndimit.
Në një intervistë për mediat ndërkombëtare, Rutte tha se Kina mund të sulmojë Tajvanin, ndërsa njëkohësisht Rusia të nisë një ofensivë ndaj ndonjë vendi të NATO-s në Evropë, për të shpërqendruar aleancën dhe për të krijuar kaos të organizuar.
“Nëse Xi Jinping vendos të sulmojë Tajvanin, nuk është e pamundur që të koordinohet me Putinin për të hapur një front të ri në Evropë,” tha Rutte, duke shtuar se kjo mund të ishte mënyra se si nis Lufta e Tretë Botërore.
Sipas Rutte, Rusia ka gjasa që deri në vitin 2027 të jetë e gatshme për një përballje të drejtpërdrejtë me NATO-n, ndërsa Kina po rrit ndikimin e saj në rajonin e Indo-Paqësorit.
Ai u bëri thirrje vendeve anëtare të NATO-s të rrisin urgjentisht investimet në mbrojtje dhe të përforcojnë bashkëpunimin strategjik, jo vetëm në Evropë, por edhe në Azi.
Këto paralajmërime vijnë në një kohë kur tensionet globale janë në rritje dhe diplomacia ndërkombëtare është përballë një sfide të re për ruajtjen e paqes dhe stabilitetit.
