Gjermania dhe Franca po bëjnë thirrje për sanksione të reja më të ashpra të BE-së kundër Rusisë, me fokus në sektorin e energjisë, sipas një dokumenti të ndarë me shtetet e tjera anëtare të BE-së.
Të dy qeveritë thanë se nafta ruse mbetet burimi kryesor i financimit të Kremlinit për luftën e saj kundër Ukrainës.
Dokumenti, bën thirrje për shënjestrimin e kompanive shtesë të naftës, të tilla si “Lukoil” me qendër në Moskë, dhe ofruesve të shërbimeve të përfshira në industrinë ruse të naftës.
Kjo mund të përfshijë kompanitë përgjegjëse për eksportimin e naftës ruse në BE ose tregtimin e naftës bruto ruse.
Zgjerimi i mekanizmit të kufizimit të çmimeve për kompanitë evropiane që transportojnë produkte të rafinuara nga nafta ruse përmes vendeve të treta është gjithashtu në shqyrtim.
Aktualisht, sanksionet synojnë kompanitë e përfshira në transportimin e naftës ruse mbi të ashtuquajturin kufizim i çmimit, duke përfshirë linjat e transportit dhe kompanitë që ofrojnë sigurime, mbështetje teknike, financim ose shërbime ndërmjetësimi.
Berlini dhe Parisi gjithashtu kërkojnë të mbyllin boshllëqet financiare dhe logjistike që i lejojnë Rusisë të shmangë sanksionet ekzistuese.
Masat e propozuara përfshijnë sanksionimin e bankave shtesë ruse dhe institucioneve të huaja të lidhura me sistemin e pagesave SPFS të bankës qendrore.
Aktualisht, rreth 250 banka të vogla dhe rajonale janë të përfshira në transaksione ndërkombëtare që mbështesin përpjekjet luftarake të Rusisë.
Gjermania dhe Franca po shqyrtojnë gjithashtu sanksione kundër aktorëve në sektorët e automobilave, aviacionit civil, arit, makinerive dhe inxhinierisë elektrike të lidhura me kompleksin ushtarako-industrial të Rusisë, si dhe ndalime të reja importi ose tarifa më të larta.
Propozimet do të përfshihen në planifikimin e një pakete të 19-të sanksionesh të BE-së, e cila do të kërkojë miratimin nga të gjitha shtetet anëtare.
Disa vende, veçanërisht Hungaria, mbeten skeptike ndaj të gjitha sanksioneve të reja kundër Rusisë, duke paraqitur një sfidë për miratimin.
