Një incident i rëndë dhune ka ndodhur në një Gurdwara në qytetin Moers të Gjermanisë, ku më shumë se 40 persona u përfshinë në përleshje, duke lënë të paktën 11 të plagosur dhe duke nxitur një operacion të madh policor.
Ngjarja ndodhi të dielën në Gurdwara Singh Sabha, një vend adhurimi dhe mbledhjeje për besimtarët e fesë sikhe. Në traditën sikhe, Gurdwara do të thotë “porta për te Guruja” dhe shërben si qendër shpirtërore dhe komunitare.
Sipas raportimeve, personat e përfshirë ishin të armatosur me sprej me piper, thika, kirpan (një armë tradicionale sikhe) dhe, sipas disa dëshmive, edhe me armë zjarri.
Përplasja dyshohet se ka nisur nga mosmarrëveshje të brendshme lidhur me financat dhe menaxhimin e institucionit fetar, megjithëse autoritetet gjermane nuk kanë konfirmuar ende një motiv zyrtar. Konflikti shpërtheu në orët e pasdites dhe u përshkallëzua me shpejtësi.
Dëshmitarët raportojnë se një grup sulmuesish përdori fillimisht sprej me piper për të çorientuar të pranishmit, përpara se situata të degjeneronte në përdorim thikash dhe armësh të tjera.
Policia reagoi me një prani të shtuar në zonë, duke përfshirë edhe njësitë speciale, për të vendosur kontrollin dhe për të parandaluar përshkallëzim të mëtejshëm të situatës.
Një dëshmitar okular, 56 vjeç, deklaroi për mediat gjermane se sulmi dukej i organizuar paraprakisht: “Pak para lutjes, sulmuesit përdorën sprej me piper dhe më pas njëri prej tyre qëlloi me armë. Pashë edhe thika.”. Hetimet për zbardhjen e plotë të rrethanave të ngjarjes janë ende në vijim.
