Zëvendësministrja e Sportit, Safije Sadiku, ka reaguar në lidhje me incidentin që ka ndodhur gjatë ndeshjes së fundit mes KB Kumanovës dhe KB Çairit. Ajo ka shkruar se ngjarjet që ndodhën mbrëmë gjatë ndeshjes ndërmjet KB Kumanovës dhe KB Çairit janë një kujtesë serioze për domosdoshmërinë e një reagimi të qartë institucional kundër gjuhës së urrejtjes dhe ofendimeve në sport.

“Si zëvendësministre e Sportit, dënoj çdo formë të sjelljes diskriminuese dhe provokimeve që cenojnë sigurinë dhe dinjitetin e sportistëve, trajnerëve dhe tifozëve. Sporti është garë dhe pasion, jo mjet për përçarje. Kërkoj nga Federata e Basketbollit dhe institucionet përkatëse që të analizojnë me seriozitet këtë rast dhe të marrin masa konkrete për të garantuar që çdo sportist të ndihet i sigurt dhe i respektuar, pavarësisht prejardhjes së tij”, ka shkruar Sadiku.

Ajo ka nënvizuar gjithashtu se sporti duhet të jetë shembull i bashkëjetesës dhe barazisë, e cila është përgjegjësi e të gjithëve – dhe mbi të gjitha, e institucioneve.