Autoritetet gjyqësore iraniane kanë ekzekutuar sot në agim një burrë të dënuar për përdhunimin dhe vrasjen e një vajze të re në provincën e Azerbajxhanit Perëndimor.
Sipas deklaratës së prokurorit Naser Atambati, dënimi kapital u zbatua në mënyrë publike “me kërkesë të familjes së viktimës dhe qytetarëve, për shkak të ndikimit emocional të thellë që ky rast kishte në komunitetin lokal”.
Megjithatë, deri më tani nuk janë bërë publike informacione të detajuara mbi moshën e viktimës, identitetin e autorit apo datën e saktë të krimit.
Procesi gjyqësor nisi në janar të këtij viti, ndërsa vendimi për dënimin me vdekje u mor në mars. Gjykata Supreme e Iranit e la në fuqi vendimin, duke refuzuar apelin e paraqitur.
Në Iran, krimet si vrasja dhe përdhunimi dënohen me vdekje, dhe sipas Amnesty International, vendi renditet i dyti në botë për numrin e ekzekutimeve, pas Kinës. Praktika e ekzekutimeve publike në Iran, zakonisht në formën e varjes dhe në orët e para të mëngjesit, mbetet ende e zakonshme, pavarësisht thirrjeve të organizatave ndërkombëtare për heqjen e dënimit kapital.
