Tensionet në Lindjen e Mesme kanë arritur një tjetër kulm pas raportimeve për humbje të mëdha në Izrael si pasojë e sulmeve nga Irani. Kryeministri izraelit, Benjamin Netanjahu, ka pranuar publikisht se vendi po përballet me “humbje të dhimbshme”, ndërsa përleshjet ushtarake vazhdojnë.
Sipas mediave ndërkombëtare, zyrtarë të lartë të ushtrisë izraelite kanë pranuar se sulmet e fundit të Iranit kanë shkaktuar dëme të konsiderueshme në objektivat ushtarake dhe infrastrukturë. Megjithëse nuk janë dhënë të dhëna zyrtare për numrin e viktimave apo të dëmtuarve, burime të ndryshme raportojnë për pasoja serioze në radhët e ushtrisë izraelite.
Kryeministri Netanjahu ka theksuar se Izraeli do të vazhdojë të mbrohet me forcë dhe ka paralajmëruar se çdo sulm do të marrë përgjigje të ashpër. “Ne kemi humbje të dhimbshme, por jemi të vendosur të mos ndalemi. Mbrojtja e vendit është prioritet absolut,” ka deklaruar ai.
