Deputetët Brane Petrushevski dhe Mile Lefkov nga radhët e opozitës VMRO-DPMNE u nisën për në Bullgari për të provuar a u lejohet të kalojnë me pasaporta me emrin e vjetër.

“Kolegu Brane do të provojë me pasaportën e thjeshtë ta kalojë kufirin, ndërsa më pas ka edhe pasaportë diplomatike. Që të dy janë me Republika e Maqedonisë.
Pa atë nuk mund të kalojmë?
Ju provojeni ne do të ju lëshojmë, mirëpo bëhet fjalë për pasaportë të thjeshtë.

Pra pa atë (pasaportën diplomatike) nuk mund të dalim?
Po kjo vlen për të gjithë ndërsa për pasaportat diplomatike nuk kemi akt të veçantë, gjithsesi bëhet fjalë për pasaportë diplomatike” tha Bane Petrushevski, deputet i VMRO-DPMNE-së.

Polici kufitar u tha se me pasaportat e thjeshta nuk mund të kalojnë mirëpo me ato diplomatike, ndonëse me emrin e vjetër, u lejoi, meqë siç u shpreh nuk ka instruksione si të veprojë.

“Kur i shfaqëm pasaportat diplomatike shërbimet këtu na thanë se nuk kanë asnjë instruksion për pasaportat diplomatike dhe se mund ta lëshojmë Republikën e Maqedonisë me pasaporta diplomatike ku qëndron Republika e Maqedonisë”, u shpreh Petrushevski.

Deputeti Lefkov edhe njëherë apeloi deri te Kuvendi që të miratohet propozim ligji me të cilin vazhdohet vlefshmëria e dokumenteve të udhëtimit.

“Kemi porosi te kolegët tanë në Kuvend, menjëherë të vendoset në votim dhe të miratohet propozim ligji për ndryshim dhe plotësim për dokumentet e udhëtimit me çka do të vazhdohet vlefshmëria e pasaportave“, tha Mile Lefkov, deputet i VMRO-DPMNE-së.

Reaguan nga partia në pushtet LSDM, prej ku thonë se partia e Mickoskit po bllokon plotësisht procesin për lëshimin e pasaportave dhe manipulon qytetarët se detyrimet nga një marrëveshje ndërkombëtare mund të ndryshohen me ligj

“DPMNE përmes ministrit në Qeverinë teknike vetëm e komplikon punët me dokumente personale dhe me vendime të gabuara dhe hapa të papërshtatshëm, bllokon dhënien e pasaportave.
Në vend të rritjes së kapaciteteve për lëshimin e pasaportave, DPMNE-ja përmes ministrit të saj teknik e hoqi dhënien e pasaportave pa termin, duke e zgjatur me muaj të tërë procesin”, thanë nga LSDM-ja.

Ndryshe zëvendësministri shtesë Mitko Bojmacaliev, në një prononcim për TV21 thotë se nuk është e vërtetë se qytetarët do të mund të udhëtojnë pa problem në vendet e Bashkimit Europian. Deklaratë kjo që vjen pas asaj të Ministrit të Brendshëm Pançe Toshkovski i cili u shpreh se është pranuar një letër nga Komiteti për dokumente udhëtimi pranë Bashkimit Europian, ku thuhet se vendet-anëtare të BE-së do ta kenë mirëkuptim dhe nuk do të bëjnë problem që qytetarët tanë të udhëtojnë me pasaporta të pandryshuara.