Një fotografi e një kamere të sistemit të mbikëqyrjes “Qytet i Sigurt”, e mbuluar me çarçaf në Tetovë, është shpërndarë gjerësisht në rrjetet sociale dhe ka nxitur reagime të shumta nga qytetarët, shkruan bulevar.mk, përcjell tetova1
Sipas publikimeve, fotoja është realizuar në një nga rrugët e qytetit dhe paraqet një kamerë të vendosur në hapësirë publike, tërësisht të mbuluar me pëlhurë, duke e bërë atë praktikisht jofunksionale. Edhe pse ende nuk ka një konfirmim zyrtar se kur dhe nga kush është vendosur mbulesa, imazhi ka hapur debat mbi funksionimin dhe seriozitetin e sistemit të video-mbikëqyrjes.
Një pjesë e qytetarëve kanë reaguar me ironi, duke e cilësuar rastin si “një mënyrë të re për mbrojtjen e privatësisë”, ndërsa të tjerë theksojnë se pamje të tilla dëmtojnë besimin në sistem dhe ngrenë dyshime për nivelin e sigurisë në hapësirat publike.
Sistemi “Qytet i Sigurt” ishte promovuar si një projekt i rëndësishëm për rritjen e sigurisë, përmirësimin e disiplinës në komunikacion dhe parandalimin e veprave penale. Megjithatë, sipas reagimeve në opinion, raste të tilla krijojnë përshtypjen se sistemi mund të anashkalohet lehtësisht.
Deri tani nuk ka njoftim nga institucionet kompetente nëse do të ndërmerren masa për largimin e mbulesës dhe kontrollimin e funksionalitetit të kamerës./tetova1.mk
