Në gusht të këtij viti u ndërprenë punimet e rrjetit të kanalizimit nga Zajazi në Drugovë – projektit më të madh në Kërçovë. Punët arritën deri diku dhe shumë rrugë në fshatrat e ish-komunës së Zajazit u hapën dhe u bënë thuajse të pa kalueshme. Me fillimin e vjeshtës dhe dimrit banorët i zuri frika se si do ta kalojnë dimrin nëpër këto rrugë, andaj sanimi i mbeti Komunës së Kërçovës, edhe pse ajo vetëm shfrytëzuese e projektit në fjalë.
Këto rrugë që po shihni para një muaji ishin të pa kalueshme dhe në gjendje të mjerueshme pasojë e kanalizimit i cili filloi nga Zajazi dhe duhej të ishte deri në Drugovë të Kërçovës por në fakt kanalizimi u ndërpre që në gusht ose korrik të këtij viti dhe punimet nuk vazhduan por rrugët mbeten si të tilla. Banorët nuk i shqetësonte më fakti i kanalizimit por i shqetësonte fakti i rrugëve se si do t’i zinte dimri. Megjithatë komuna premtoi se do t’i rregullonte rrugët pavarësisht nëse çështja e kanalizimit do të rregullohej ose jo. Tanimë në fshatin Greshnicë janë rregulluar dhe pritet që të rregullohen edhe në fshatin Zajaz dhe fshatrat tjerë ku u shkatërruan.
Kryetari i Komunës së Kërçovës tha se ka filluar t’i sanojë rrugët dhe po bëjnë të pa mundurën që të sanohen të gjitha rrugët që u prishën si pasojë e punimeve të rrjetit të kanalizimit.
Sa i përket çështjes së kanalizimit, Dehari tha se po bëjnë maksimumin që punimet te vazhdojnë dhe se janë në kontakt të vazhdueshëm me ministrinë për Transport dhe Lidhje që të gjendjet një zgjidhje.
Kujtojmë se punimet u ndërprenë për shkak se kompania “Akelik Group LLC” nga Azerbajxhani e cila fitoi tenderin, garancinë bankare prej 2 milionë eurove e ka siguruar nga një bankë azerbajxhanase që ka falimentuar dhe kjo ka bërë që kompania të pezullojë punimet. Siç mëson TV21 afati për përfundimin e projektit është deri në shkurt 2025, afat ky i shkurtër që ia vështirëson kompanisë realizuese që të sigurojë garanci tjetër bankare, andaj kërkojnë nga Ministria e Financave si punëdhënëse e projektit ta shtyjnë afatin e realizimit të punimeve.
