Një video e kandidatit për kryetar bashkie të New York City (NYC), Zohran Mamdani, i cili zotohet të arrestojë kryeministrin izraelit Benjamin Netanyahu, është bërë virale në mediat sociale. Ky zhvillim vjen mes konfliktit të vazhdueshëm Izrael-Iran dhe fitores së Mamdanit në zgjedhjet paraprake Demokrate.
Videoja virale është një fragment nga intervista e Mamdanit me gazetarin Mehdi Hasan, e cila u publikua fillimisht në YouTube në dhjetor të vitit të kaluar.
Gjatë intervistës, Hasan pyeti: “Dhe kryetari i bashkisë Mamdani, a do ta mirëpriste kryeministrin Netanyahu në New York City për çfarëdo që të vijë, duke pasur parasysh se SHBA-të nuk janë nënshkruese të GJNP-së, kështu që ai mund të udhëtojë në SHBA, ndryshe nga shumë vende të tjera? A do ta mirëpriste një kryetar bashkie Mamdani Benjamin Netanyahun në qytet?”.
“Jo. Si Kryetar Bashkie, qyteti i New York-ut do të arrestonte Benjamin Netanyahun. Ky është një qytet ku vlerat tona janë në përputhje me të drejtën ndërkombëtare. Është koha që edhe veprimet tona të jenë në përputhje me të drejtën ndërkombëtare”, tha me Mamdani.
“Edhe pse SHBA-të nuk janë nënshkruese të GJNP-së?”, pyeti Hasani.
Zohran Mamdani kishte vërejtur: “Jo, është koha që ne të ndërmarrim hapa të vërtetë dhe të sqarojmë se çfarë jemi të gatshëm të bëjmë për të shfaqur lidershipin që mungon shumë në administratën federale”.
