Rreth 1200 persona janë paraqitur në konkursin e dhjetorit për punësimin e 600 policëve të rinj, theksojnë për Alsat nga Ministria e Punëve të Brendshme, ndërkaq vijon procesi i seleksionimit. Sipas shpalljes, gjysma e kandidatëve të zgjedhur do të punësohen në Shkup, ndërkaq të tjerët nëpër sektorët për punë të brendshme në mbarë vendin.

Të dhënat e siguruara nga Alsat tregojnë se për 10 vitet e fundit vazhdimisht ka rënie të interesimit për tu bërë polic.

Nëse dikur për një vend në polici kishin konkurruar 10 persona, me konkursin e fundit për një pozitë luftojnë vetëm 2.

Konkursi, po zhvillohet në mungesë të një mekanizmi ligjor për sigurimin e përfaqësimit të drejtë dhe adekuat, pasi Gjykata Kushtetuese në tetor të vitit të kaluar e shfuqizoi balancuesin, gjegjësisht ndaloi punësimet në bazë të përkatësisë etnike. Ministri i Punëve të Brendshme, Pançe Toshkovski, paraprakisht për Alsat theksoi se pavarësisht këtij fakti, do të respektohet përfaqësimi i drejtë dhe adekuat.

“Janë të mirëseardhur në Ministrinë e Punëve të Brendshme të gjithë ata që e duan Maqedoninë dhe të cilët janë të gatshëm ta japin jetën për sigurinë e qytetarëve të tyre, për familjet e tyre. Profesionistë kemi, profesionistë do të ndërtojmë në të ardhmen. Po, në kuadër të Ministrisë së Punëve të Brendshme punojnë profesionistë edhe maqedonas, edhe shqiptarë, edhe turq edhe vlleh, romë serbë, boshnjakë…”, deklalroi Pançe Toshkovski, ministër i Punëve të Brendshme.

Kandidatët në procesin e seleksionimit, krahas kushteve të përgjithshme, duhet të kenë aftësi shëndetësore dhe psikofizike.

Procedura e seleksionimit të kandidatëve zbatohet nga ana e Komisionit për zgjedhje të kandidatëve për polic i formuar nga ana e ministrit i cili e përcakton sekuencën e fazave të seleksionimit. Fillimisht bëhet seleksionimi administrativ, pastaj vijohet me testimin e aftësive motorike ku bëhet kontrolli i gatishmërisë fizike të kandidatit. Kandidatët më pas u nënshtrohen testimit psikologji dhe testimit të përgjithshëm arsimor. Nëse kalon këto faza, kandidati ftohet për intervistë, gjegjësisht bisedë individuale, pas çka kryhen kontrollet e sigurisë dhe bëhen kontrollet shëndetësore.

Nëse kandidati me sukses i kalon këto faza, atëherë lidh marrëveshje për trajnimin bazë për polic në afat prej një viti, i cili realizohet në Qendrën për Trajnim të MPB-së. Pas përfundimit të trajnimit bazë, kandidati lidh marrëveshje dhe fiton statusin “polic-praktikant”. Polici i ri, detyrohet që së paku të mbetet në punë pesë vjet, në të kundërtën duhet t’i kompensojë për trefish shpenzimet për trajnim.

Nga Ministria e Punëve të Brendshme, paralajmërojnë se të shtunën do të bëhet promovimi i policëve të rinj, të cilët janë zgjedhur nga konkursi paraprak. /Alsat.mk