Zëvendësministrja e Transportit, Kaltrina Zekolli, ka sqaruar ecurinë e punimeve në Korridorin 8, duke vënë theksin te segmenti Trebenishtë – Qafë Thanë dhe sfidat e hasura nga projektimi i kaluar. Përmes një komunikimi për opinionin publik, Zekolli ka bërë të ditur se progresi në Korridorin 8 është i dukshëm në të gjitha segmentet ku janë përmbushur kushtet ligjore. Megjithatë, ajo ka zbuluar një lëshim serioz në projektin fillestar të segmentit Trebenishtë – Qafë Thanë. Problemi me UNESCO-n dhe projektet e “ngrira” Sipas Zekollit, gjatë fazës së projektimit fillestar që është trashëguar, nuk është kërkuar mendim nga UNESCO, pavarësisht se bëhet fjalë për një zonë tejet të ndjeshme. “Në takimin e fundit me përfaqësuesit e UNESCO-s, janë paraqitur qartë vërejtjet për projektin aktual të cilin e kemi trashëguar. Për ne është thelbësore që të mos rrezikohet në asnjë moment statusi i vendit tonë në këtë organizatë,” u shpreh Zekolli. Ajo shtoi se shumica e projekteve në Ministrinë e Transportit kishin mbetur të palëvizura për dekada, por gjatë dy viteve të fundit është arritur të sigurohet një dinamikë e re dhe progres real. Lidhja me Shqipërinë: Prioritet Strategjik Zëvendësministrja garantoi se autostrada Strugë – Qafë Thanë do të realizohet me patjetër. Aktualisht po punohet për gjetjen e modalitetit më të përshtatshëm teknik në koordinim me UNESCO-n, që projekti të jetë në përputhje me standardet ndërkombëtare. Lajm i mirë vjen edhe për pikën kufitare: • Përfundimi i punimeve: Ministria është drejt fundit të rikonstruksionit dhe zgjerimit të pikës kufitare në Qafë Thanë. • Lidhja funksionale: Ky investim dëshmon përkushtimin për një lidhje të plotë infrastrukturore me Republikën e Shqipërisë. “Lidhja me Shqipërinë është prioritet strategjik dhe do të realizohet pavarësisht zgjidhjes teknike që do të përzgjidhet,” përfundoi Zekolli.
Trending
