Kosova ka shënuar një hap të rëndësishëm në industrinë e mbrojtjes, duke prodhuar dronin e saj të parë luftarak. Bëhet fjalë për “SKIFTERI K1”, një mjet ajror pa pilot me kapacitete të avancuara goditëse dhe rreze të gjatë veprimi.
Sipas të dhënave të publikuara, “SKIFTERI K1” ofron kapacitete maksimale fluturimi deri në 7 orë e 12 minuta dhe një rreze veprimi deri në 1.124 kilometra. Këto janë kapacitetet maksimale të projektuara të dronit dhe jo domosdoshmërisht rezultat i një testimi të vetëm.
Droni është i aftë të operojë në konfigurim të armatosur, me një kapacitet ngarkese (payload) deri në 42 kilogramë, duke e bërë të përshtatshëm për misione goditëse nga ajri në distanca të gjata.
“SKIFTERI K1” është testuar dhe theksi vendoset te saktësia dhe funksionaliteti operacional, ndërsa të dhënat teknike tregojnë potencialin e tij për përdorim në misione strategjike ajrore.
