Mijëra besimtarë myslimanë janë mbledhur të martën në malin Arafat, pranë Mekës, në kulmin e pelegrinazhit të Haxhit në Arabinë Saudite, mes temperaturave që kanë arritur rreth 40 gradë Celsius.
Që në orët e para të mëngjesit, pelegrinët e veshur me rroba të bardha kanë recituar vargje nga Kurani në kodrën shkëmbore rreth 70 metra të lartë, vend i shenjtë ku, sipas traditës islame, profeti Muhamed mbajti predikimin e tij të fundit.
Autoritetet dhe vullnetarët kanë shpërndarë ujë, çadra për mbrojtje nga dielli dhe pako ushqimore për dhjetëra mijëra besimtarë që janë ngjitur drejt zonës së Arafatit. Sipas të dhënave zyrtare, mbi 1.5 milion pelegrinë po marrin pjesë këtë vit në Haxh, pavarësisht tensioneve në Lindjen e Mesme.
Sipas mediave iraniane, rreth 30 mijë pelegrinë nga Irani kanë arritur në Mekë, dukshëm më pak se 86 mijë të planifikuar fillimisht, për shkak të situatës së konfliktit në rajon.
Autoritetet saudite kanë bërë thirrje për kujdes të shtuar ndaj temperaturave të larta, duke u kërkuar pelegrinëve të konsumojnë ujë dhe të shmangin ekspozimin e gjatë në diell, ndërsa në ditët e fundit temperaturat kanë shkuar deri në 44 gradë Celsius.
Pas qëndrimit në Arafat, pelegrinët do të kalojnë natën në Muzdalifah, ku do të mbledhin gurë për ritualin simbolik të “goditjes së djallit” në Mina, i cili nis të mërkurën.
Haxhi mbetet një nga pesë shtyllat e Islamit dhe detyrim për çdo mysliman që ka mundësi fizike dhe financiare për ta kryer të paktën një herë në jetë.
