Shumë prej nesh e nisin ditën me një filxhan kafe pa konsumuar më parë ujë ose ushqim, duke e kthyer këtë zakon në një pjesë të pandarë të mëngjesit. Por, sipas ekspertëve, pirja e kafesë menjëherë pas zgjimit nuk është gjithmonë zgjedhja më e mirë për organizmin.
Kjo lidhet me nivelin e kortizolit – hormoni i stresit – i cili arrin pikun më të lartë në mëngjes, rreth orës 4 deri në 5. Kortizoli ndihmon trupin të zgjohet dhe të bëhet më vigjilent në mënyrë natyrale, kështu që në këtë kohë trupi nuk ka nevojë për kafeinë shtesë. Për pasojë, efekti stimulues i kafesë mund të jetë më i dobët nëse konsumohet menjëherë pas zgjimit.
Gjithashtu, si kortizoli ashtu edhe kafeina ndikojnë në rritjen e presionit të gjakut. Për ata që vuajnë nga tensioni i lartë, pirja e kafesë në këtë kohë mund të përkeqësojë gjendjen shëndetësore.
Ekspertët rekomandojnë që të pritet të paktën 20 minuta pas zgjimit para se të pihet kafeja, ndërsa koha ideale është nga 45 minuta deri në një orë. Kjo ndihmon që kafeina të ketë efekt më të plotë dhe që trupi të ruajë një ekuilibër më të shëndetshëm hormonal.
Pra, për të përfituar maksimalisht nga energjia e kafesë dhe për të ruajtur mirëqenien e përgjithshme, është mirë që momenti i parë i kafesë në mëngjes të shtyhet pak më vonë.
