Në një epokë ku Inteligjenca Artificiale po zëvendëson me shpejtësi profesionet njerëzore, një deklaratë tronditëse dhe e sinqertë vjen nga vetë “kumbari” i kësaj revolucioni teknologjik: Geoffrey Hinton, ish-punonjës i Google dhe një nga mendjet më të rëndësishme pas zhvillimit të IA-së.
77-vjeçari britanik, i cili dha dorëheqjen nga Google në vitin 2023 për të paralajmëruar njerëzimin për rreziqet ekzistenciale të inteligjencës artificiale, është shprehur hapur për industrinë që do të “mbijetojë” më gjatë në botën e dominimit teknologjik.
“Do të kalojë shumë kohë para se kompjuterët të bëhen aq të mirë në manipulim fizik sa ne… një bast i sigurt është që njerëzit të bëhen hidraulikë”, tha Hinton në një intervistë për podkastin “Diary of a CEO” të Steven Bartlett.
Ai theksoi se ndërsa profesione si avokatët, kontabilistët dhe asistentët ligjorë janë ndër më të rrezikuarit për t’u zëvendësuar, profesione që përfshijnë ndërhyrje fizike, fleksibilitet dhe zgjidhje kreative në terren – si puna e hidraulikut – janë më të mbrojtura.
“Hidraulikët janë më pak në rrezik. Një robot nuk mund të zvarritet nën lavaman, të marrë një pjesë të vjetër dhe ta zëvendësojë me një të re me improvizim njerëzor,” shtoi ai.
Në një kohë kur automatizimi po transformon çdo aspekt të tregut të punës, këshilla e Hinton vjen si thirrje për t’i kthyer sytë nga profesionet praktike, që shpesh anashkalohen, por që mund të jenë garancia më e mirë për siguri ekonomike në të ardhmen.
Hinton, i cili ka ndihmuar në ndërtimin e teknologjisë që sot po sfidon njerëzimin, tashmë është bërë zëri më i fuqishëm që paralajmëron: nëse nuk veprojmë tani, shumë njerëz do të mbeten të papërgatitur për botën që po vjen.
