Në kuadër të Task Forcës për realizimin efikas të projekteve energjetike, ShA MEPSO po luan një rol kyç në tejkalimin e sfidave pronësore-juridike që ndikojnë në zhvillimin e rrjetit elektrotransmetues.
Në takimin e mbajtur në Ministrinë e Energjetikës, ku mori pjesë edhe Drejtori i Përgjithshëm i MEPSO, Burim Latifi, u diskutua mbi vështirësitë e hasura për shkak të procedurave të gjata administrative që pengojnë realizimin e projekteve strategjike. Një nga projektet që ka hasur në pengesa është ndërtimi i një trafostacioni të ri pranë fshatit Miletkovë, një investim i rëndësishëm për modernizimin e rrjetit elektrotransmetues.
Latifi theksoi se për stabilitetin energjetik dhe integrimin e tregut të RMV me rrjetet rajonale dhe evropiane, është e domosdoshme koordinimi i përforcuar ndërinstitucional mes MEPSO-s, Ministrisë së Energjetikës, Ministrisë së Transportit dhe Lidhjeve, Agjencisë së Kadastrës dhe Administratës për çështjet pronësore-juridike.
“Me një bashkëpunim të ngushtë dhe përkushtim të plotë, mund të tejkalojmë sfidat dhe të sigurojmë zbatim të shpejtë e pa vonesa të projekteve kapitale që janë vendimtare për transmetimin stabil dhe të besueshëm të energjisë elektrike,” – theksoi Latifi.
Vendosmëria e institucioneve për të adresuar këto çështje do të mundësojë realizimin në kohë të projekteve energjetike, duke shmangur vonesat dhe kostot shtesë, si dhe duke garantuar një furnizim më të sigurt dhe më të qëndrueshëm me energji elektrike për vendin.
