Një zjarr shpërtheu në orët e para të së premtes në rafinerinë Mina Al-Ahmadi të Kompanisë Kombëtare të Naftës së Kuvajtit (KNPC), pasi objekti u godit nga sulme me dronë, njoftoi agjencia shtetërore e lajmeve KUNA.
Sipas autoriteteve kuvajtiane, flakët përfshinë disa njësi të rafinerisë, ndërsa ekipet zjarrfikëse u angazhuan për vënien e situatës nën kontroll. Deri tani nuk raportohen viktima.
Sipas raportimeve zyrtare, sulmi i së premtes është i dyti brenda dy ditësh ndaj të njëjtit objekt, pasi edhe një ditë më parë në Mina Al-Ahmadi ishte regjistruar një tjetër goditje që kishte shkaktuar zjarr. Si masë sigurie, disa njësi të rafinerisë janë mbyllur përkohësisht, ndërsa vijon vlerësimi i dëmeve dhe operacioni për izolimin e plotë të flakëve.
Ngjarja shihet si pjesë e një vale më të gjerë tensionesh në rajon, ku infrastruktura energjetike e vendeve të Gjirit është kthyer në objektiv të sulmeve me dronë dhe raketa.
Rafineria Mina Al-Ahmadi ka peshë të veçantë në sektorin energjetik të Kuvajtit. Sipas KNPC, ajo është pjesë e rrjetit kryesor të përpunimit të vendit, ndërsa bashkë me rafinerinë Mina Abdullah përbën bazën e kapaciteteve të rafinimit të kompanisë shtetërore. Për këtë arsye, çdo goditje ndaj këtij objekti konsiderohet me ndikim të mundshëm jo vetëm për tregun vendas, por edhe për stabilitetin e furnizimeve rajonale.
Sulmi i fundit shton shqetësimet për sigurinë e infrastrukturës së naftës në Gjirin Persik, në një kohë kur tregjet ndërkombëtare po reagojnë ndaj rrezikut të ndërprerjeve të furnizimit. Raportimet ndërkombëtare tregojnë se tensionet e ditëve të fundit kanë ushtruar presion të ri mbi çmimet e energjisë dhe mbi sigurinë e korridoreve strategjike të eksportit në rajon.
