Autoritetet shqiptare kanë zhvilluar sot një mega-operacion kundër evazionit fiskal, ku në fokus ka qenë kompania “Bankers Petroleum” dhe disa prej figurave të lidhura me skema të dyshuara të pastrimit të parave dhe mashtrimit financiar.
Nga 14 urdhërarreste të lëshuara nga Prokuroria, 10 janë ekzekutuar me sukses, përfshirë edhe një emër që ka tërhequr vëmendjen e opinionit publik: Ardit Kero, ish-bashkëshorti i moderatores së njohur shqiptare Arbana Osmani.
Kero dyshohet për përfshirje aktive në pastrim parash dhe evazion fiskal në bashkëpunim me struktura të tjera, brenda skemës së përfolur të mashtrimit që ka sjellë dëme të konsiderueshme në buxhetin e shtetit.
Ndërkohë, Arbana Osmani, e cila prej vitesh është shkëputur nga marrëdhënia me Keron, nuk ka bërë asnjë reagim zyrtar. E vetmja shenjë publike nga ana e saj është një video e shpërndarë në “Instastory” që ditën e djeshme, pa lidhje me ngjarjen, çka është interpretuar nga shumë si një vendim i qëllimshëm për të ruajtur distancën nga zhvillimet.
Në sytë e publikut, heshtja e saj është një formë reagimi në vetvete – një vendim për të mos e përfshirë veten në një çështje ligjore që i përket të kaluarës së saj personale, por që tashmë ka marrë një përmasë publike.
Operacioni në fjalë pritet të ketë zhvillime të tjera në ditët në vijim, ndërsa hetimet për rrjetin e evazionit vazhdojnë. Emrat e tjerë të përfshirë dhe përmasat e dëmit financiar janë ende nën vlerësim nga organet përkatëse.
