Në takimin bilateral mes Qeverisë së Maqedonisë së Veriut dhe asaj të Kroacisë, të udhëhequr nga kryeministrat Hristijan Mickoski dhe Andrej Plenković, u riafirmua partneriteti strategjik ndërmjet dy vendeve dhe përkushtimi për thellimin e bashkëpunimit në fusha kyçe si ekonomia, infrastruktura dhe energjetika. Në kuadër të këtij takimi, u theksua rëndësia e investimeve të huaja, zhvillimit të infrastrukturës energjetike dhe projekteve rajonale të ndërlidhjes, me fokus të veçantë në interkoneksionin energjetik me Shqipërinë.
Pas nënshkrimit të Marrëveshjes për bashkëpunim strategjik ndërmjet dy qeverive, pata kënaqësinë të marr pjesë në sesionin e dialogut ekonomik dhe rrjetëzimit ndërmjet përfaqësuesve institucionalë dhe komunitetit të biznesit, ku u shqyrtuan mundësi konkrete për investime të reja, zgjerimin e bashkëpunimit ekonomik dhe forcimin e lidhjeve ndërmjet sektorit publik dhe privat.
Në cilësinë e drejtorit të MEPSO-s, theksova rëndësinë strategjike të zhvillimit të infrastrukturës energjetike dhe transformimit digjital të sistemit të transmetimit të energjisë elektrike, si parakusht për rritjen e sigurisë dhe stabilitetit energjetik, si dhe për integrim më të madh në tregjet evropiane të energjisë.
Në këtë kontekst, nënvizova se fokusi ynë aktual është i orientuar drejt projekteve të ndërlidhjes rajonale, veçanërisht interkoneksionit me Republikën e Shqipërisë përmes ndërtimit të nënstacionit dhe linjës së transmetimit, dy projekte strategjike të realizuara nga kompani kroate me reputacion ndërkombëtar, si “Dalekovod Zagreb” dhe “Končar Group”.
Gjithashtu, theksova se, bazuar në përvojën time profesionale, e njoh mirë rëndësinë e investimeve të huaja dhe rolin e tyre kyç në zhvillimin e institucioneve publike dhe kompanive private, përmes kontributit në modernizim, rritje të kapaciteteve dhe përmirësim të performancës ekonomike.
Ky bashkëpunim i thelluar ndërmjet Republikës së Maqedonisë së Veriut dhe Republikës së Kroacisë përbën një hap të rëndësishëm drejt forcimit të partneritetit strategjik, zhvillimit të infrastrukturës energjetike rajonale dhe krijimit të një klime më të favorshme për investime të qëndrueshme dhe zhvillim afatgjatë.
