Presidenti i Libanit, Joseph Aoun, ka riafirmuar qëndrimin e Bejrutit për fundin e pranisë ushtarake izraelite në jug të vendit. Ai theksoi se autoritetet libaneze nuk do të pranojnë asnjë zgjidhje që nuk garanton tërheqjen e plotë të forcave izraelite dhe largimin e çdo ndërhyrjeje të huaj.
Gjatë një takimi me Komandantin e Përgjithshëm të Forcave të Armatosura Libaneze, Rodolphe Haykal, Aoun deklaroi se sovraniteti kombëtar mbetet prioriteti kryesor i shtetit libanez.
“Nuk do të pranojmë asgjë më pak se fundi i pushtimit izraelit në Libanin jugor dhe largimi i të gjitha forcave të huaja”, u shpreh presidenti.
Aoun theksoi se mbrojtja e qytetarëve duhet të garantohet vetëm nga institucionet shtetërore, duke shtuar se e ardhmja e vendit duhet të mbështetet te shteti libanez dhe jo te aktorë të jashtëm.
Presidenti libanez vlerësoi gjithashtu rrugën e dialogut dhe negociatave, duke argumentuar se zhvillimet e fundit kanë dëshmuar se diplomacia mbetet alternativa më efektive për zgjidhjen e tensioneve me Izraelin.
Sipas tij, një raund i ri negociatash ka nisur tashmë në Uashington dhe pritet të vazhdojë gjatë ditëve në vijim. Aoun shprehu shpresën se këto bisedime do të jenë vendimtare për arritjen e objektivave të Libanit dhe për forcimin e stabilitetit në rajon.
“Zgjedhja jonë e vetme është sovraniteti ynë kombëtar dhe basti ynë i vetëm është shteti libanez, i cili, vetëm dhe falë askujt tjetër, mbron të gjithë qytetarët e tij. Për më tepër, ‘zhvillimet e ditëve të fundit kanë treguar vlefshmërinë e vendimit tonë për të zgjedhur negociatat’ me Izraelin.
Ne kemi nisur sot dhe do të vazhdojmë gjatë dy ditëve të ardhshme një raund të ri negociatash (me Izraelin, në Uashington) të cilat shpresojmë se do të jenë vendimtare në rrugën drejt arritjes së asaj që duam për atdheun dhe popullin tonë”, tha presidenti i Libanit.
Deklaratat e presidentit vijnë në një moment delikat, teksa armëpushimi i arritur së fundmi mes palëve mbetet i brishtë dhe tensionet në kufirin jugor vazhdojnë të monitorohen me kujdes nga komuniteti ndërkombëtar.
