Legjenda e peshave të rënda të boksit, George Foreman, ka ndërruar jetë në moshën 76-vjeçare. I njohur ndryshe në ring si “Big George”, amerikani ndërtoi një nga karrierat më të shquara dhe të qëndrueshme në këtë sport.

Në një postim në “Instagram” familjarët e tij shpehën dhimbje e thellë për humbjen e boksierit.

“ Zemrat tona janë thyer. Ai ishte një predikues i devotshëm, një bashkëshort i përkushtuar, një baba i dashur, një gjysh e stërgjysh krenar. Ai jetoi një jetë të shënuar nga besimi i palëkundur, përulësia dhe qëllimi. Një humanitar, një olimpik dhe dy herë kampion i botës në peshat e rënda. Ai ishte thellësisht i respektuar, ishte një forcë për të mirën, një njeri me disiplinë, bindje dhe një mbrojtës i trashëgimisë së tij, duke luftuar pa u lodhur për të ruajtur emrin e tij të mirë, për familjen e tij”, shkruhet në postim.

Homazhet për legjendën e boksit nuk munguan as nga kampionët e botës me të cilët ai është ndeshur në ring. Ish-kampioni i botës Mike Tyson është shprehur se kontributi i Foreman në boks dhe më gjerë nuk do të harrohet kurrë.

George Foreman lindi në Marshall, Teksas, më 10 Janar 1949 dhe u rrit së bashku me 6 vëllezër e motra në jugun e Amerikës. Ai e la shkollën dhe iu drejtua grabitjeve në rrugë përpara se të gjente përfundimisht daljen e tij në ring.

Në vitin 1968 ai fitoi medaljen e artë olimpike, ndërkohë që ka pretenduar titullin botëror në peshat e rënda, me 20 vite diferencë, duke e bërë kështu George Foremanin kampionin më të vjetër në histori, kur ai ishte në moshën 45-vjeçare.

Foreman humbi titullin e tij të parë ndaj Muhammad Ali në dyluftimin e tyre të famshme “Rumble in the Jungle” në vitin 1974. Por në përgjithësi, ai “mburrej” me një total mahnitës prej 76 fitoresh./tvklan.al