Koordinatori i grupit parlamentar të VMRO-DPMNE-së, Nikola Micevski, mendon se tragjedia në Koçani duhet të shërbejë si një mësim, duke theksuar se nuk duhet të reagojmë gjithmonë pas ngjarjeve të tilla, por se ka ardhur koha për një rinovim të plotë të shtetit.
Në një paraqitje në Dnevnikun Qendror të MRT-së, Micevski theksoi se është duke u hartuar një ligj i ri për materialet eksplozivë për përdorim civil, por pas ngjarjes në Koçani, ishte e nevojshme të reagohet për të bërë ndryshime urgjente në ligjin për kundërvajtje ndaj rendit dhe qetësisë publike.
Ai shtoi se janë të planifikuara ndryshime të plota në disa ligje, por që nuk kanë arritur të realizohen, andaj u reagua urgjentisht në këtë segment.
“Konkrektisht, në ligjin e propozuar, përcaktohet se përdorimi i mjeteve piroteknike të cilat janë të përcaktuara me ligj nuk lejohet në objekte dhe hapësira të mbyllura. Megjithatë, këto nuk janë vetëm këto ndryshime që ne i parashikojmë në këtë projekt-ligj. Do të ndryshohet ligji për materialet eksplozivë për përdorim civil, dhe me ligjin kundër kundërvajtjeve për rendin dhe qetësinë publike do të mbulohen edhe segmente të tjera që prekin qytetarët”, tha Micevski.
Në lidhje me Komisionet Hetimore, Micevski thotë se Partia Socialdemokrate po imponon disa tema në opinion, por ende nuk ka një propozim për Kuvendin, ndërsa iniciativa që ka paraqitur Fronti Evropian është kundërkushtetuese dhe për të është nënshkruar vetëm nga 16 deputetë, ndonëse nevojiten 20 nënshkrime.
“Informacionet që kam, ajo që ka paraqitur Fronti Evropian si kërkesë në Kuvend është jashtë normave kushtetuese. Kjo, pasi për krijimin e një komisioni hetimor kërkohen 20 nënshkrime nga deputetët, dhe ata aktualisht kanë vetëm 16 nënshkrime. Po ashtu, vetë titulli i asaj komisie hetimore, apo ajo për të marrë informacion për gjendjen, është pak shqetësues, duke pasur parasysh se Kuvendi nuk ka, ose komisioni vetë nuk ka funksion hetimor. Ajo që duhet të bëjë Kuvendi është të arrijë në përfundime politike në bazë të asaj që ka ndodhur për një gjendje të caktuar, ngjarje ose proces”, tha Micevski.
