Kryeministri izraelit Benjamin Netanyahu ka dhënë një përditësim lidhur me zhvillimet e fundit në konfliktin me Iranin dhe situatën në Liban, në një kohë kur po flitet për një armëpushim të mundshëm.
Në një deklaratë me video, Netanyahu bëri të ditur se forcat izraelite aktualisht po përmbahen nga sulmet ndaj Hezbollahut, por mbeten në gatishmëri të plotë për një ofensivë në jug të Libanit, përfshirë edhe mundësinë e pushtimit të qytetit strategjik Bint Jbeil.
Ai theksoi se ka udhëzuar Forcat Mbrojtëse të Izraelit (IDF) që të vazhdojnë forcimin e zonës së sigurisë në territorin jugor të Libanit, duke e konsideruar këtë një masë të nevojshme për mbrojtjen e vendit.
Netanyahu u ndal edhe te bashkëpunimi me Shtetet e Bashkuara, duke deklaruar se Uashingtoni e mban vazhdimisht të informuar Izraelin mbi kontaktet me Iranin dhe se objektivat e dy vendeve janë të njëjta.
Megjithatë, ai paralajmëroi se Izraeli mbetet i përgatitur për çdo zhvillim, në rast se situata përshkallëzohet.
“Jemi të përgatitur për çdo skenar”, u shpreh Netanyahu.
Deklaratat e tij vijnë pas një takimi të kabinetit të sigurisë dhe në vijim të bisedimeve diplomatike mes përfaqësuesve izraelitë dhe libanezë në Uashington, ku është diskutuar mundësia e një armëpushimi.
