Kryeministri i Izraelit, Benjamin Netanyahu, ka deklaruar se rruga drejt paqes me Libanin është e gjatë, duke iu referuar armëpushimit të arritur në këtë shtet.
“Në një dorë mbajmë një armë; në tjetrën shtrihet paqja”, ka thënë Netanyahu në një deklaratë, duke mbrojtur vendimin e tij për të pranuar një armëpushim 10-ditor me Libanin.
Me kërkesë të presidentit të Shteteve të Bashkuara të Amerikës, Netanyahu tha se po ofrohet një mundësi për të çuar përpara një zgjidhje të kombinuar diplomatike dhe ushtarake me qeverinë libaneze.
Megjithatë, ai theksoi se lufta kundër Hezbollahut nuk ka përfunduar ende. Sipas tij, që nga 7 tetori 2023, Izraeli ka eliminuar kërcënimin e infiltrimit të Hezbollahut dhe shumicën e raketave antitank, si dhe 90% të raketave të grupit.
“Do të jem i sinqertë, nuk kemi mbaruar ende. Ka gjëra që planifikojmë të bëjmë në lidhje me kërcënimin e mbetur të raketave dhe kërcënimin e dronëve, të cilat nuk do t’i detajoj”, ka thënë ai.
Netanyahu shtoi se Izraeli po punon gjithashtu për “çmontimin” e Hezbollahut, por theksoi se kjo nuk mund të arrihet menjëherë.
“Kërkon përpjekje të vazhdueshme, durim dhe lundrim të kujdesshëm në arenën diplomatike”, ka deklaruar ai.
