Presidenti i SHBA-së, Donald Trump, do të presë të hënën e ardhshme në Shtëpinë e Bardhë kryeministrin izraelit Benjamin Netanyahu në një përpjekje të re diplomatike për të ndërmjetësuar një armëpushim në Gaza dhe për të arritur një marrëveshje për lirimin e pengjeve.
Lajmin e konfirmuan dy zyrtarë të administratës amerikane, që folën në kushte anonimiteti për shkak të mungesës së autorizimit për deklarata publike.
Kjo vizitë e tretë e Netanyahut në Uashington që nga rikthimi i Donald Trump në detyrë në janar vjen në një moment të tensionuar rajonal, pas ndërhyrjes ushtarake të SHBA-së në konfliktin midis Izraelit dhe Iranit, përfshirë sulmet ndaj centraleve bërthamore iraniane. Pas ndërmjetësimit të armëpushimit mes dy fuqive, vëmendja e administratës amerikane është fokusuar te lufta në Gaza.
Në një deklaratë për mediat të premten, Trump shprehu optimizëm: “Mendojmë se brenda javës së ardhshme do të arrijmë një armëpushim në Gaza”, pa dhënë detaje për bazën e këtij parashikimi.
Sekretarja e shtypit e Shtëpisë së Bardhë, Karoline Leavitt, konfirmoi komunikimet e vazhdueshme me udhëheqjen izraelite dhe theksoi se përfundimi i konfliktit mbetet një prioritet kryesor i presidentit amerikan.
“Është zemërthyese të shohësh imazhet që vijnë nga Izraeli dhe Gaza gjatë kësaj lufte, presidenti dëshiron që kjo të marrë fund. Ai dëshiron të shpëtojë jetë,” tha Leavitt.
Ndërkohë, ministri izraelit për Çështjet Strategjike, Ron Dermer, ndodhet në Uashington për bisedime intensive mbi armëpushimin në Gaza, situatën me Iranin pas përshkallëzimit ushtarak dhe të ardhmen politike e humanitare të Rripit të Gazës.
Takimi Trump–Netanyahu pritet të jetë vendimtar për drejtimin e përpjekjeve diplomatike amerikane në rajon dhe sinjal i angazhimit aktiv të SHBA-së në zgjidhjen e krizës izraelito-palestineze.
