Një stuhi e madhe ka përfshirë pjesë të Arabisë Saudite, përfshirë Mekën, duke shkaktuar përmbytje në disa zona. Fotot nga periferia e qytetit tregojnë automjete pothuajse tërësisht të përmbytura.
Shërbimi Meteorologjik i Arabisë Saudite ka lëshuar një alarm të kuq për Mekën, Medinën dhe qytetin port Xheda, i cili gjithashtu ishte vendi i një përmbytjeje katastrofike në vitin 2009, ku humbën jetën mbi 100 persona.
Pamjet tregojnë banorët duke braktisur makinat e tyre në rrugë për t’u larguar në vende të sigurta.
Departamenti i Arsimit në Medinë ka publikuar foto të punëtorëve që riparojnë energjinë elektrike dhe kondicionerët, si dhe që largojnë ujin e grumbulluar.
Në Dubai, përmbytjet kanë përfshirë aeroportin dhe shumë rrugë përreth, duke çuar në anulimin e dhjetëra fluturimeve.
Në kohën kur po ndodhin këto stuhi, në Arabinë Saudite gjenden relativisht numër i madh i qytetarëve nga Maqedonia e Veriut.
Nga BFI e Maqedonisë thonë se në bazë të informatave të para, Umrexhinjtë nga Maqedonia janë shëndosh e mirë.
“Ne nuk jemi organizatorë të Umres, sepse ato organizohen kryesisht nga kompani private si nga vendi, poashtu edhe nga diaspora. Megjithatë po interesohemi vazhdimisht për gjendjen e tyre. Por në bazë të informatave nga kontaktet e para që kemi realizuar, të gjithë Unrexhinjtë nga vendi ynë janë shëndosh e mirë”, thonë nga BFI për portalin Lideri.mk.
“Këto janë informacionet e para jozyrtare, kurse për çfardo informacione të teja eventuale, ne do ta informojmë opinionin me kohë”, kanë shtuar nga BFI./Lideri
