Shkup, 20.04.2024 – Nxënësit e talentuar të shkollës së muzikës kanë arritur të sjellin krenari në skenën ndërkombëtare gjatë garave për piano “Polyhymnia” të mbajtura në Shkup. Nën udhëheqjen e mësueses së përkushtuar, Fjolla Lena Elmazi, ata u klasifikuan në pozicione të larta, duke lënë një përshtypje të thellë në konkurrencën e fortë.

Pjesëmarrës nga rajoni, përfshirë Maqedoninë e Veriut, Serbinë, Kosovën dhe Malin e Zi, sollën një sfidë të madhe, por nxënësit nga Tetova u dalluan për performancën e tyre të jashtëzakonshme. Poema Neziri shkëlqeu në garë, duke fituar çmimin e parë me një rezultat mbresëlënës prej 97 pikësh. Ndërsa Arban Rakipi nuk mbeti pas, duke siguruar çmimin e dytë me 85 pikë.

Mësuesja Elmazi shprehu kënaqësinë e saj për suksesin e nxënësve dhe theksoi se ky është vetëm fillimi i një rrugëtimi të gjatë dhe të frytshëm. Ajo zbuloi se janë duke u përgatitur për garat e ardhshme brenda dhe jashtë vendit, me shpresën se në të ardhmen këta fëmijë do të bëhen ambasadorë të kulturës dhe do të përfaqësojnë vendin në skena më të mëdha botërore.

Ky sukses vjen si një dëshmi e qartë e talentit dhe përkushtimit që nxënësit dhe mësuesit kanë treguar, duke u bërë burim frymëzimi për të rinjtë dhe duke ngritur lart emrin e shkollës së muzikës në arenën ndërkombëtare.