“Maqedonia e Veriut ka bërë një punë të shkëlqyer me Planin e Rritjes dhe falë kësaj, vendit do t’i ndahen 140 milionë euro për të kontribuar në përparimin e mëtejshëm”, tha Pamer në eventin e sotëm të iniciativës “Slavkov 3” në Shtëpinë Evropiane në Shkup.
Ai vlerësoi se është e rëndësishme që vendi të ruajë ritmin e reformave dhe të vazhdojë me përkushtimin ndaj procesit të integrimit evropian. Pamer theksoi se aktualisht ka një interes në rritje për procesin e zgjerimit në Bashkimin Evropian dhe se, ndryshe nga periudha e mëparshme, po diskutohen edhe vende specifike që mund të bashkohen me BE.
Më 27 shtator, në Vjenë do të mbahet një konferencë ministrore midis vendeve të Ballkanit Perëndimor dhe Austrisë, Republikës Çeke dhe Sllovakisë, në kuadër të formatit “Slavkov 3”. Në takim do të diskutohet progresi i vendeve të rajonit drejt BE-së dhe vazhdimi i procesit të reformave.
Lidhur me strategjinë e re të zgjerimit të BE-së, e cila pritet të publikohet më 30 shtator, ai vuri në dukje se diskutimet mbi propozimet e ndryshme janë ende duke vazhduar.
Si përfitime konkrete të afrimit me BE-në, ambasadori austriak theksoi edhe bashkimin me Sistemin e Vetëm Evropian të Pagesave – SEPA, i cili lejon kosto më të ulëta për transfertat dhe pagesat.
Ai njoftoi gjithashtu hapa të mëtejshëm drejt heqjes së kostove të roaming midis Maqedonisë së Veriut dhe BE-së.
