Shkup/Tiranl/Sofje, 1 prill Zhurnal.mk – Tensionet gjeopolitike në rajon kanë ngritur shqetësime të reja për sigurinë, pasi si Irani ashtu edhe Shtetet e Bashkuara kanë dërguar sinjale paralajmëruese ndaj vendeve të Ballkanit.
Sipas informacioneve të publikuara, Irani i ka dërguar një notë zyrtare Bullgarisë gjatë muajit të kaluar, duke kërkuar që të mos lejojë përdorimin e aeroporteve të saj nga SHBA për operacione që lidhen me Iranin. Në dokumentin diplomatik të datës 18 mars, Teherani thekson se “rezervon të drejtën të ndërmarrë të gjitha masat e nevojshme” për mbrojtjen e interesave të tij.
Autenticiteti i këtij dokumenti është konfirmuar nga zëvendësministri bullgar Marin Rajkov, i cili ka sqaruar se Bullgaria nuk merr pjesë në operacione ushtarake, duke theksuar se marrëdhëniet diplomatike mes dy vendeve mbeten stabile.
Në të njëjtën kohë, edhe Shqipëria ka marrë një paralajmërim nga Ambasada e SHBA-së për rreziqe të mundshme nga grupe të lidhura me Iranin. Ambasada u ka bërë thirrje qytetarëve amerikanë të jenë vigjilentë, duke theksuar se mund të shënjestrohen subjekte të lidhura me interesat amerikane ose me opozitën iraniane në Shqipëri.
Këshilltari për sigurinë në Partinë Demokratike, Xhemal Gjunkshi, e cilësoi këtë paralajmërim si një “sinjal serioz për sigurinë kombëtare”, duke kërkuar reagim institucional dhe masa konkrete nga autoritetet shqiptare.
Po Maqedonia e Veriut?
Mes këtyre zhvillimeve, vëmendja bie edhe mbi Maqedoninë e Veriut, e cila ndodhet mes Shqipërisë dhe Bullgarisë dhe është pjesë e të njëjtit hapësirë strategjike.
Megjithëse nuk ka paralajmërime direkte për Shkupin, ekspertët vlerësojnë se çdo tension në rajon mund të ketë efekt zinxhir, sidomos për shkak të bashkëpunimit të ngushtë të vendeve të Ballkanit me NATO-n dhe partnerët perëndimorë.
Maqedonia e Veriut, si anëtare e NATO-s, konsiderohet pjesë e sistemit kolektiv të sigurisë, çka e bën më të mbrojtur, por njëkohësisht edhe më të ndjeshme ndaj zhvillimeve gjeopolitike.
Një rajon në vëzhgim
Ndërsa deklaratat zyrtare përpiqen të qetësojnë situatën, mesazhet e fundit nga Irani dhe SHBA tregojnë se Ballkani mbetet një zonë me rëndësi strategjike.
Pyetja që mbetet është nëse këto janë vetëm sinjale parandaluese apo tregues të një dinamike më të gjerë që po zhvillohet në prapaskenë.
