Në një moment kur skena politike shqiptare në Maqedoninë e Veriut po përjeton zhvillime të rëndësishme, Arben Fetai nga Aleanca për Shqiptarët ka reaguar publikisht pas një vizite në Prishtinë, ku zhvilloi një takim me kryeministrin e Kosovës, Albin Kurti.
Ky takim vjen pak ditë pas largimit të kreut të ASH-së, Arben Taravari, nga koalicioni VLEN, një veprim që ka sjellë ndarje brenda partisë. Por postimi i sotëm i Fetait në Facebook sinjalizon qartë se një pjesë e Aleancës për Shqiptarët mbetet e përkushtuar ndaj rrugës së nisur — bashkëpunimit me opozitën shqiptare dhe mbështetjes së zotimeve të bëra më herët ndaj kryeministrit Kurti.
“Në agimin e kësaj dite, së bashku me disa miq të idealit nga Aleanca për Shqiptarët, morëm rrugën drejt Prishtinës, duke përshkuar autostradën ‘Arbën Xhaferi’, një rrugë që për ne nuk është thjesht infrastrukturë, por simbol i lidhjes sonë shpirtërore dhe kombëtare,” shkruan Fetai, duke theksuar përkatësinë e tyre politike dhe emocionale me Kosovën.
Në takimin me Kurtin, Fetai e përshkruan bisedën si “vëllazërore” dhe nënvizon se “ajo që na bashkon sot, më shumë se kurrë, është vizioni dhe ideali ynë i përbashkët për progres dhe zhvillim, një ideal që s’njeh kufij, as pengesa.”
Ky mesazh interpretohet nga analistët si një qëndrim i qartë kundër largimit të Taravarit nga VLEN dhe një sinjal se Aleanca për Shqiptarët, megjithë ndarjet e brendshme, ka anëtarë që duan ta ruajnë linjën e bashkëpunimit me opozitën shqiptare dhe partnerët natyralë në Kosovë.
Takimi në Prishtinë dhe deklaratat që e shoqëruan atë pritet të kenë jehonë në zhvillimet e ardhshme politike dhe të ndikojnë në riformësimin e krahut opozitar shqiptar në Maqedoninë e Veriut.
