Kryetari i Aleancës për Shqiptarët, Arben Taravari, ka publikuar sot një fotografi me kryeministrin e Shqipërisë, Edi Rama, i cili po qëndron në Maqedoninë e Veriut në kuadër të Samitit të liderëve të Ballkanit Perëndimor.
Në përshkrimin që shoqëron foton, Taravari e ka cilësuar Ramën si “kryeministrin që e sjell Evropën kaq afër Ballkanit”, duke shprehur një mesazh të qartë vlerësimi për rolin e tij në proceset integruese rajonale.
Megjithëse në të kaluarën kishte raporte të mira me kryeministrin e Kosovës, Albin Kurti, Taravari ka pranuar së fundmi se nuk ka pasur kontakt me të prej kohësh. Në një intervistë të fundit ai ka deklaruar se komunikimi mes tyre është ndërprerë, pa dhënë arsye të qarta për ftohjen e marrëdhënies.
Ky pozicionim publik i Taravarit pranë Ramës vjen në një kontekst ku marrëdhëniet politike ndërshqiptare në rajon po kalojnë një fazë ndarjeje të thellë, me aleanca të reja dhe distancime që reflektohen qartazi edhe në lëvizjet dhe deklaratat publike të liderëve shqiptarë.
