Myftinia e Tetovës, grupi i udhëhequr nga myftiu Qani Nesimi dhe që kundërshton vendimin e rijasetit sot i ka dërguar një letër reisit ulema hafiz Shaqir ef. Fetahu ku e informon të njëjtin se nuk do të heqin dorë nga Myftinia e Tetovës për ti lëshuar vendin Selver ef.Xhemaili.

Ato sot kanë mbajtur një mbledhje ku kanë potencuar edhe njëherë se nuk njohin asnjë vendim të sjellur në mënyrë joligjore siç thonë ato dhe se do ti qëndrojnë pas myftiut Qani Nesimi. “Dënojmë ashpër aktin e pahijshëm dhe tentimin e të emëruarit UD Mufti Dr. Selver ef. Xhemailit më datë 31.01.20224, që në mënyrë klandestine dhe të dhunshme tentoi të futet në Institucionin e shenjtë të muslimanëve të Tetovës-Muftinia e Tetovës” thuhet në njoftim.

Myftinia e Tetovës kërkon nga të gjitha institucionet relevante në vendin tonë që të dënojnë sjelljet e pahijshme të UD Dr. Selver ef. Xhemaili, sepse i vetmi organ që jep dhe merr mandat është Organi i Muftinisë së Tetovës i zgjedhur nga Kuvendi i Xhematit ku reflektohet vullneti i nëpunësve dhe Xhematit të Tetovës.

“Vulat e Muftinisë së Bashkësisë Fetare Islame të Tetovës i takojnë Organit të Muftinisë së Tetovës dhe nga sot, 01.02.2024 i merr në posedim Organi Kolektiv i Muftinisë së Tetovës, ndërsa vula jolegale që mban me vete UD është jolegale dhe jokushtetuese” thuhet në letrën informuese.
“Ne, si Muftini e Tetovës, dënojmë çdo veprim dhe vendim antikushtetues dhe përçarës. Zotohemi se me çdo kusht do të mbrojmë unitetin e BFI-së dhe Muftinisë së Tetovës” përfundon letra e Myftinisë së Tetovës të udhëhequr nga Qani Nesimi drejtuar reisit Shaqir ef.Fetahu. /Tetova1