Nga gjithsej 115 pacientët që po trajtohen jashtë vendit pasi u lënduan në zjarrin në Koçan, pesë prej tyre janë në gjendje serioze shëndetësore. I pari i shëndetësisë, Arben Taravari gjithashtu njoftoi se nga pacientët që po trajtohen nëpër spitalet e vendit 12 sot lëshohen për kurim shtëpiak, ndërkaq edhe një pacient që po trajtohej në Beograd e që është në gjendje të mirë, do të sillet në Shkup për trajtim të mëtejshëm, për t’u lëshuar më pas në shtëpi.

“Sot planifikohet të lëshohen për shërim shtëpiak 12 pacientë, që do të thotë se do të mbesin 27 pacientë që do të vazhdojnë të shërohen nëpër spitalet dhe klinikat e Shkupit. Jashtë shtetit vazhdojnë të jenë 115 pacientë, një lajm i mirë është se njëri nga këta pacientë sot kthehet në Maqedoni për të vazhduar me shërim këtu, sipas rregullave dhe protokolleve që kemi përgatitur”, tha Arben Taravari.

Në pyetjen e TV21 se si e vlerëson ministri Taravari punën e tij me menaxhimin e krejt situatës me pacientët që kanë pësuar lëndime nga tragjedia në Koçan, ai tha se kanë bërë një punë intensive.
“Nuk është puna ime, është puna e ekipit, këto që i shihni dhe plot të punësuarve në shëndetësi që aspak nuk i shihni nëpër press konferenca, këtu jemi vetëm 6-7 veta, ekipi që ka funksionuar kanë qenë mbi 20-30 vetë të cilët kanë dhënë mund të jashtëzakonshëm. Për vlerësim duhet të japin qytetarët”, deklaroi Taravari.

Disa vende të Europës Perëndimore kanë ofruar rehabilitim afatgjatë për pacientët me sëmundje më të rëndë, trajtimi i të cilëve mund të zgjas me javë ose me muaj, njoftoi Taravari, pas takimi me shtabin e krizës.