Policia shqiptare ka finalizuar operacionin policor të koduar “Organizatori”, ku janë arrestuar tre persona nën akuzën për tregti armësh dhe falsifikim dokumentesh, të cilat do të përfundonin në territorin e Maqedonisë së Veriut.
“Gjatë kontrollit të një automjeti u gjetën tre armë zjarri të tipit ‘kallashnikov’, 3.320 fishekë luftarakë si dhe granata, për të cilat hetimet tregojnë se ishin të destinuara për kontrabandë në Maqedoninë e Veriut. Në shtëpinë e njërit prej të arrestuarve u gjetën dhe u sekuestruan 20 dokumente të falsifikuara, përfshirë pasaporta, karta identiteti dhe leje qëndrimi shqiptare, bullgare dhe maqedonase, si dhe pajisje të përdorura për këtë aktivitet kriminal”, thuhet në njoftimin e policisë.
Të arrestuarit janë: Dimitër Peçini (59) nga Elbasani, organizatori kryesor, Elban Çoniku (52) nga Gramshi dhe Artan Lila (47) nga Elbasani, të cilët do të përgjigjen për tregti të paligjshme armësh dhe falsifikim dokumentesh.
Operacioni policor u finalizua pas një hetimi katërmujor, duke përdorur metoda speciale nga sektori i hetimeve për krime ekonomike dhe nga njësia për hetimin e tregtisë së paligjshme pranë Drejtorisë Vendore të Policisë në Elbasan.
Hetimet vazhdojnë nën drejtimin e Prokurorisë së Elbasanit dhe në bashkëpunim me autoritetet maqedonase për të identifikuar dhe ndjekur penalisht persona të tjerë të përfshirë në këto veprimtari kriminale.
