Presidenti i Emirateve të Bashkuara Arabe, Sheik Mohammed bin Zayed, ka mbërritur për një vizitë zyrtare disa orëshe në Tiranë, në të parën vizitë të tij në Shqipëri. Presidenti Zayed është pritur në Rinas nga Kryeministri, Edi Rama. Më pas së bashku i janë drejtuar Pallatit të Brigadave për ceremoninë shtetërore.
Sipas mediave në Shqipëri, gjatë kësaj vizite pritet të nënshkruhen dy marrëveshje: e para, në fushën e energjisë, që pritet ta nënshkruajë Zv/ Kryeministrja, Belinda Balluku, dhe e dyta, ka të bëjë me zbatimin e projektit “Albania Smart City”, për vendosjen e kamerave të sigurisë, ku nënshkrues do të jetë Ministri i Brendshëm, Ervin Hoxha.
Duke folur për këtë ngjarje, një ditë më parë, kryeministri Rama tha se vizita e Presidentit të Emirateve të Bashkuara Arabe dhe njërit prej udhëheqësve më të respektuar të botës së sotme, shënon “një gur shumë të rëndësishëm kilometrik në rrugën e një miqësie dhe partneriteti që është forcuar shumë vitet e fundit”.
Kjo është vizita e dytë e Sheikut Bin Zayed në Shqipëri, pas asaj të vitit 1999 në Kukës, ku u strehuan mijëra qytetarë të Kosovës gjatë luftës. Kryeministri Rama e konsideron, Sheikun Bin Zayed, një ndër miqtë special të Shqipërisë dhe popullit të saj.
