Analisti politik Qenan Aliu ka reaguar pas debatit të ndezur mbi një deklaratë të kreut të Lëvizjes BESA, Bilall Kasami, lidhur me rolin e Arben Taravarit në kuadër të koalicionit opozitar VLEN.

Në një koment publik, Aliu sqaroi se deklarata e Kasamit është interpretuar në mënyrë të njëanshme dhe është përdorur si mjet propagandistik.

“Bilall Kasami nuk tha se Taravari është zero. Ai, si ekonomist, përdori një shembull numerik për të ilustruar idenë se VLEN është njësi matëse e vlerës në politikë. Njëshi ishte VLEN-i, ndërsa të tjerët – përfshirë Taravarin – ishin zerot që pasojnë njëshin dhe marrin kuptim vetëm në funksion të tij,” shkroi Aliu.

Ai theksoi se deklarata duhet parë në kontekstin e plotë të intervistës, dhe jo të shkëputet për qëllime politike.

“Mbase retorika ‘live’ e një interviste mund të shkëputet aty ku do propaganda,” përfundoi Aliu.