Qeveria ka miratuar një vendim për shpalljen e gjendjes së krizës në të gjithë territorin, e cila do të zgjasë 30 ditë, si rezultat i konfliktit të interesave në përdorimin e burimeve dhe rrugëve të burimeve strategjike të energjisë, si dhe pengimit dhe bllokimit të importit të tyre në vend, transmeton Portalb.mk.
Në ditën e hyrjes në fuqi të këtij vendimi, aktivizohet selia kryesore e Qendrës për Menaxhimin e Krizave, e cila do të jetë në seancë të vazhdueshme për të monitoruar masat dhe aktivitetet dhe për të koordinuar veprimet.
Ky vendim qeveritar i detyron organet e administratës shtetërore të marrin masa dhe aktivitete për t’u përballur me situatën dhe për të kapërcyer pasojat e konfliktit të interesave në përdorimin e burimeve dhe rrugëve të burimeve strategjike të energjisë, si dhe pengimit dhe bllokimit të importit të tyre në Maqedoni.
Kriza aktuale e çmimeve të karburanteve lidhet ngushtë me zhvillimet gjeopolitike në Lindjen e Mesme, ku përshkallëzimi i konfliktit ushtarak i udhëhequr nga Shtetet e Bashkuara të Amerikës dhe Izraeli ka ndikuar drejtpërdrejt edhe në tregjet globale të energjisë. Ky tension ka shkaktuar pasiguri në furnizimin me naftë dhe rritje të çmimeve në bursat ndërkombëtare, duke reflektuar më pas edhe në vendet e rajonit. Si pasojë, shumë shtete janë përballur me rritje të kostove të importit të karburanteve, çka ka detyruar qeveritë të ndërhyjnë me masa fiskale dhe rregullatore për të zbutur ndikimin tek qytetarët.
