Në adres të portalit “tetova1” ka ardhur një reagim nga K.F Sharri nga fshati Gllogjë që garon në ligën e 4-tët (Ligën Komunale Tetovë)
Në reagim thuhet:
Çellopek, 14 Prill 2025 – Kaotike dhe e mbushur me tension përfundoi ndeshja mes Besa Çellopek dhe KF Sharri 1979, e vlefshme për kampionatin rajonal, ku skuadra mysafire u tërhoq nga fusha në minutën e 80-të si shenjë proteste ndaj asaj që e quan “referim skandaloz”.
KF Sharri, që ishte në avantazh 1-2 në atë moment, ka reaguar ashpër pas ndeshjes duke denoncuar publikisht vendimet e arbitrave dhe mënyrën e menaxhimit të ndeshjes nga delegati. Në deklaratën e tyre zyrtare, klubi përmend emrat e arbitrave Muzafer Ismaili (kryesor), Plarent Salihi dhe Habil Livoreka (anësorë), si dhe delegatin Hamit Spahiu, duke i akuzuar për favorizim të hapur ndaj skuadrës vendase.
Sipas KF Sharrit, vendimi për një penallti të dyshimtë në minutën e 78-të, ndjekur nga një tjetër penallti vetëm dy minuta më pas në favor të Besa Çellopek, ishte pika që çoi në prishjen e ndeshjes. Gjithashtu, klubi shpreh indinjatë ndaj vendimeve të njëpasnjëshme për pozicion jashtë loje ndaj tyre, edhe kur ato ndodhnin në gjysmën e tyre të fushës.
“Jemi detyruar të largohemi nga fusha, pasi referimi ishte i papranueshëm dhe totalisht i njëanshëm,” thuhet në reagimin e KF Sharrit. Klubi paralajmëron se do të dorëzojë ankesë zyrtare në LFK Tetovë dhe kërkon që të merren masa ndaj arbitrave. Në të kundërt, ata kërcënojnë me bojkotim të kampionatit.
“Me djersën tonë, me mundin e bashkëfshatarëve dhe të hollat tona nuk mund të luaj askush. Kjo nuk është sport, kjo është turp!” – përfundon reagimi nga K.F Sharri- Gllogjë.
/tetova1/
