Sekretari amerikan i Shtetit Marco Rubio ka deklaruar se operacionet ushtarake kundër Iranit nuk kishin si qëllim ndryshimin e regjimit në Teheran, duke theksuar se objektivi kryesor ishte dobësimi i kapaciteteve ushtarake konvencionale të vendit.
“Do të donim të shihnim një ndryshim në Iran, por ky nuk ishte qëllimi i misionit tonë”, u shpreh Rubio gjatë dëshmisë së tij para Kongresit amerikan.
Ai shtoi se fushata ushtarake kishte për qëllim neutralizimin e një “mburoje konvencionale” të Iranit, e përbërë nga raketa, dronë dhe forca detare, të cilat sipas tij i mundësonin vendit të zhvillonte programin e tij bërthamor.
“Gjithkush e dinte se çfarë mund të bënte Irani në përgjigje”, tha ai, duke shtuar se administrata ishte “e përgatitur për çdo skenar”, pavarësisht rreziqeve për rritjen e çmimeve të energjisë dhe destabilizimin rajonal.
Megjithatë, ai theksoi se rreziku më i madh mbetej mundësia që Irani të pajisej me armë bërthamore, të cilën Washingtoni e konsideron vijë të kuqe strategjike.
Deklaratat e Rubios bien në kontrast me qëndrime të mëparshme të presidentit amerikan Donald Trump, i cili në fazat e hershme të konfliktit kishte sugjeruar hapur mundësinë e ndryshimit të regjimit në Iran dhe kishte inkurajuar protestat kundër qeverisë së Teheranit.
Seanca në Kongres u zhvillua në një klimë të tensionuar politike, ku ligjvënësit demokratë e pyetën zyrtarin amerikan për ndikimin e konfliktit në çmimet globale të energjisë, sigurinë e aleatëve në Gjirin Persik dhe rrezikun e përshkallëzimit të mëtejshëm ushtarak.
