Kryetarja e Këshillit të Federatës së Rusisë, Valentina Matviyenko, ka deklaruar se Moska nuk ka asnjë plan për të rrëmbyer presidentin ukrainas Volodymyr Zelensky, duke theksuar se një veprim i tillë nuk përputhet me mënyrën e veprimit të Rusisë.
Në një intervistë për median ruse TASS, Matviyenko reagoi ndaj spekulimeve të përhapura së fundmi.
“Po sugjeroni që ne të rrëmbejmë Zelenskyn? Ky nuk është stili ynë. Ne jemi vendi më me vetërespekt dhe më i respektuar në botë. Nëse do ta bënim këtë, do të humbisnim respektin për veten”, tha Matviyenko.
Ajo shtoi se përdorimi i metodave të tilla do të dëmtonte rëndë reputacionin ndërkombëtar të Rusisë, duke bërë një krahasim me veprimet e Shteteve të Bashkuara:
“Pa përmendur që Shtetet e Bashkuara nuk fituan asgjë nga vrasja e ajatollahut Ali Khamenei. Por njolla do të mbetet përgjithmonë në histori”, tha ajo.
Deklarata e saj vjen në një kohë kur janë përhapur pretendime dhe hipoteza në rrjet lidhur me mundësinë e një skenari të ngjashëm me atë të Venezuelës, ku SHBA-të ndërmorën një operacion që çoi në kapjen dhe largimin nga vendi të presidentit Nicolas Maduro dhe bashkëshortes së tij.
Megjithatë, Matviyenko theksoi se, pavarësisht refuzimit për rrëmbim apo eliminim fizik, presidenti ukrainas duhet të përballet me drejtësinë:
“Zelensky duhet të përballet me gjyqin… dhe të ndëshkohet për veprimet e tij”, u shpreh ajo.
Nga ana tjetër, zyrtarët ukrainas kanë deklaruar se gjatë vitit 2022 janë parandaluar disa tentativa për atentate ndaj presidentit Zelensky, megjithëse pa dhënë detaje të mëtejshme mbi këto raste.
