Një maket i një kartëmonedhe të propozuar prej 250 dollarësh që paraqet fytyrën dhe firmën e presidentit
Zyrtarë të administratës së Donald Trump ushtruan presion ndaj agjencisë amerikane përgjegjëse për prodhimin e kartëmonedhave, me qëllim hartimin e një prerjeje prej 250 dollarësh me portretin e presidentit amerikan, raporton Washington Post duke cituar katër punonjës aktualë dhe ish-punonjës të institucionit.
Nëse projekti realizohet, do të ishte hera e parë pas më shumë se 150 vitesh që një person në jetë shfaqet në një kartëmonedhë amerikane.
Sipas gazetës, dy zyrtarë të emëruar nga administrata Trump në Departamentin e Thesarit — Brandon Beach dhe këshilltari i tij Mike Brown — kanë kërkuar vazhdimisht nga Byroja e Gravurës dhe Shtypjes të përgatisë modele provë të kartëmonedhës së re.
Washington Post raporton se gjatë muajve gusht dhe shtator, Beach dorëzoi disa variante dizajni, përfshirë një model ku portreti i Donald Trump shfaqej në qendër të kartëmonedhës 250-dollarëshe, mes firmave të presidentit dhe sekretarit të Thesarit, Scott Bessent.
Artisti britanik Ian Alexander, i cili deklaroi se realizoi modelin grafik, tha për gazetën se kishte diskutuar projektin drejtpërdrejt me Trumpin. Sipas tij, presidenti amerikan kishte sugjeruar shtimin e ngjyrave të flamurit amerikan dhe një logoje për 250-vjetorin e themelimit të SHBA-së.
“Pëlqen të më quajë artisti i tij i preferuar britanik”, deklaroi Alexander, i cili prezantohet si portretist i Mbretëreshës Elizabeth II dhe figurave të tjera publike.
Herën e fundit që një person në jetë u shfaq në valutën amerikane ishte viti 1866, përpara se të vendosej ndalimi ligjor pas përdorimit të imazhit të një zyrtari të Thesarit në një kartëmonedhë prej 5 centësh.
Vitit të kaluar në Kongres u paraqit një projektligj që do të lejonte emetimin e kartëmonedhës 250-dollarëshe me portretin e Trumpit, si pjesë e festimeve për 250-vjetorin e SHBA-së, por iniciativa nuk avancoi.
Një zëdhënës i Departamentit të Thesarit deklaroi se agjencia “po kryen planifikimin dhe verifikimet e nevojshme” lidhur me legjislacionin e propozuar.
“Nëse kjo nismë ligjore bëhet ligj, Byroja e Gravurës dhe Shtypjes po vepron paraprakisht për të prodhuar një kartëmonedhë përkujtimore prej 250 dollarësh që do të nderojë siç duhet 250-vjetorin e vendit tonë”, thuhet në deklaratë.
Megjithatë, drejtues të agjencisë kanë argumentuar se ekzistojnë pengesa të rëndësishme ligjore dhe procedurale. Ish-drejtorë dhe specialistë të politikës monetare theksojnë se ligji amerikan lejon vetëm paraqitjen e personave të ndjerë në kartëmonedha.
