Një aksident i rëndë ka ndodhur sot në Stamboll, pasi dy ndërtesa janë shembur pas një shpërthimi të fuqishëm, me shumë gjasa të shkaktuar nga një rrjedhje gazi.
Ngjarja ka ndodhur në pjesën qendrore të qytetit, në lagjen Fatih, ku menjëherë pas shpërthimit në terren kanë dalë ekipe të shumta shpëtimi, zjarrfikës dhe shërbime mjekësore.
Sipas informacioneve fillestare, disa persona kanë mbetur të bllokuar nën rrënoja. Shpëtimtarët deri më tani kanë arritur të nxjerrin disa persona të lënduar, të cilët janë dërguar në spital, ndërsa kërkimet për të tjerët vazhdojnë.
Dëshmitarët okularë thonë se është dëgjuar një detonim i fuqishëm, pas të cilit ndërtesat janë shembur për pak sekonda, duke shkaktuar panik te banorët.
Autoritetet bënë të ditur se ekziston dyshimi se shpërthimi është shkaktuar nga gazi natyror, por shkaku i saktë po përcaktohet ende. Paralelisht me shpëtimin, ka nisur edhe një hetim për aksidentin.
Zona është siguruar plotësisht, ndërsa një numër i madh qytetarësh janë mbledhur në afërsi, teksa ekipet e shpëtimit punojnë në një garë kundër kohës për të nxjerrë të mbijetuarit.
Autoritetet u bëjnë thirrje qytetarëve që të mos i afrohen vendit të aksidentit dhe të lejojnë shërbimet që të kryejnë punën e tyre pa pengesa.
