Nga prilli i vitit 2025, në Slloveni do të ndalohet përdorimi i të gjitha aromave në cigaret elektronike dhe produktet e duhanit të ngrohur, me përjashtim të aromës së duhanit. Ky vendim vjen si pjesë e një ligji të ri të miratuar nga Kuvendi Kombëtar i Sllovenisë, i cili synon të reduktojë tërheqjen e këtyre produkteve ndaj të rinjve.
Fillimisht ishte propozuar që të lejohej edhe aroma e mentolit, por deputetët vendosën që edhe ajo të ndalohet, duke lejuar vetëm aromën klasike të duhanit. Përveç ndalimit të aromave, ligji përfshin edhe ndalimin e shitjes online të cigareve elektronike, si dhe importimin e tyre nga jashtë nga individët. Gjithashtu, deri në fund të vitit 2025, pritet të ndalohen edhe dhomat e posaçme për duhanpirje në vende publike si baret dhe aeroportet.
Autoritetet sllovene e kanë cilësuar këtë hap si një masë të nevojshme për të mbrojtur shëndetin publik, sidomos të brezit të ri. Sllovenia i bashkohet kështu një numri në rritje të vendeve të BE-së që po vendosin kufizime më të rrepta për produktet alternative të duhanit.
