Pakistani ka deklaruar se ka ardhur koha për të zbatuar paktin e mbrojtjes me Arabinë Saudite dhe Turqinë, pas një sulmi me dron pranë Mekës, për të cilin Riadi fajëson Houthi-t.
“Pakta e Mekës zbatohet për ne dhe ne do të përmbushim detyrën tonë”, deklaroi ministri pakistanez i Mbrojtjes, Khawaja Asif, për televizionin Geo News.
Asif tha se Pakistani nuk do të diskutojë publikisht detajet e marrëveshjes, por theksoi se pakti parashikon mbrojtje të ndërsjellë nëse cenohet integriteti territorial ose kufijtë gjeografikë të njërit prej tre vendeve.
Sipas tij, nuk ka “absolutisht asnjë paqartësi” për zbatimin e marrëveshjes në këtë rast.
Arabia Saudite njoftoi se mbrojtja e saj ajrore interceptoi dhe shkatërroi të martën një dron Houthi në jug të Mekës, përpara se ai të hynte në hapësirën ajrore të ndaluar mbi qytetin e shenjtë.
Houthi-t mohuan se kishin shënjestruar Mekën, duke deklaruar se operacionet e tyre drejtohen ndaj objekteve saudite të naftës dhe bazave ushtarake, larg vendeve të shenjta.
Edhe Irani reagoi ndaj incidentit. Zëdhënësi i Ministrisë së Jashtme, Esmaeil Baghaei, dënoi çdo sulm ndaj vendeve të shenjta islame, por tha se njoftimi për interceptimin e dronit nuk provon se kush ishte përgjegjës.
“Një pretendim i vetëm” se një dron është interceptuar gjatë rrugës drejt Mekës nuk mund të shërbejë si bazë për të akuzuar një palë të caktuar, deklaroi ai.
Kryeministri pakistanez Shehbaz Sharif tha ndërkohë se Islamabadi qëndron “krah për krah” me Riadin dhe dënoi atë që e cilësoi si një tentativë sulmi “të poshtër dhe të urryer” me dron ndaj Mekës.
