Ministri i Shëndetësisë, Arben Taravari, ka deklaruar për A2 CNN se situata e pacientëve të lënduar nga tragjedia në Koçan po shkon drejt stabilizimit. Ai ka theksuar se për momentin, në klinikat e Shkupit gjenden 54 pacientë, ndërsa 115 të tjerë vazhdojnë trajtimin jashtë vendit.
“Gjatë këtyre ditëve, afër 200 pacientë janë trajtuar, ndërsa dje dhe pardje janë liruar në mjekim shtëpiak 14 pacientë. Nga java e ardhshme, situata e pacientëve jashtë shtetit pritet të përmirësohet dhe gradualisht do të fillojmë të lëshojmë disa prej tyre për trajtim në shtëpi në Maqedoni, ndërsa do të pranojmë mes 5 dhe 10 pacientë nga jashtë vendit”, u shpreh ministri.
Taravari theksoi gjithashtu se situata e pacientëve në gjendje kritike ka shënuar përmirësim.
“Ditën e diel në konferencë për shtyp deklarova se 21 pacientë ishin në gjendje të rëndë dhe në rrezik për jetë. Sot, fatmirësisht, vetëm 6 prej tyre ndodhen ende në gjendje kritike, ndërsa 15 pacientë të tjerë janë stabilizuar dhe nuk rrezikojnë më jetën. Po i monitorojmë me kujdes dhe marrim informacione dy herë në ditë nga të gjitha shtetet ku ata trajtohen. Fatmirësisht, rreth 30 pacientë pritet të kthehen javët e ardhshme (këtë javë) në Maqedoni, ku do ta vazhdojnë trajtimin e tyre”, deklaroi ai.
Ministri ka siguruar opinionin se institucionet shëndetësore janë duke punuar intensivisht për të siguruar trajtimin e duhur për të lënduarit dhe se procesi i rehabilitimit po ecën sipas planeve të parashikuara.
