Ministri i Jashtëm i Pakistanit, Ishaq Dar, ka deklaruar se si Irani ashtu edhe Shtetet e Bashkuara kanë “shprehur besimin se Pakistani do të lehtësojë” bisedimet mes tyre, duke sinjalizuar një rol të mundshëm ndërmjetësues të Islamabadit në një nga tensionet më të ndjeshme ndërkombëtare.
Ai u shpreh se Pakistani “do të jetë i nderuar të presë dhe lehtësojë bisedime kuptimplote midis dy palëve në ditët në vijim”, duke lënë të kuptohet se përpjekjet diplomatike janë në zhvillim. Megjithatë, deri më tani nuk ka një konfirmim zyrtar nga SHBA apo Irani për pjesëmarrje në një proces të tillë negociues.
“Pakistani do të jetë i nderuar të presë dhe të lehtësojë bisedime kuptimplote midis dy palëve në ditët në vijim, për një zgjidhje gjithëpërfshirëse dhe të qëndrueshme të konfliktit të vazhdueshëm”, u shpreh Ministri i Jashtëm i Pakistanit, Ishaq Dar.
Deklaratat e Dar erdhën pas ditës së parë të takimeve në Islamabad mes ministrave të jashtëm të Pakistanit, Arabisë Saudite, Turqisë dhe Egjiptit. Sipas tij, palët diskutuan mënyrat për t’i dhënë fund konfliktit në rajon “herët dhe përgjithmonë”, duke theksuar nevojën për një zgjidhje të qëndrueshme.
Dar shprehu gjithashtu “mirënjohje të thellë” për mbështetjen e Arabisë Saudite, Turqisë dhe Egjiptit ndaj përpjekjeve të Pakistanit për paqe, ndërsa bëri të ditur se kishte zhvilluar biseda edhe me Ministrin e Jashtëm të Kinës, Wang Yi, dhe Sekretarin e Përgjithshëm të OKB-së, të cilët, sipas tij, “kanë shprehur mbështetje për iniciativën e paqes”.
Në një zhvillim paralel, pas takimit mes Kryeministrit të Pakistanit dhe ministrit të Jashtëm të Arabisë Saudite, u publikua një deklaratë ku theksohet se Pakistani “gjithmonë do të qëndrojë krah për krah” me Arabinë Saudite dhe vlerëson “përmbajtjen e jashtëzakonshme” të treguar nga ky vend.
