“Një dëm i madh iu bë Serbisë”, tha presidenti i këtij vendi, Aleksandar Vuçiq, pas lajmit se kompania e Jared Kushnerit – dhëndrit të presidentit amerikan Donald Trump – po tërhiqej nga projekti i planifikuar për ndërtimin e një kompleksi luksoz në Beograd.
Në vendin ku ndodheshin ndërtesat e Shtabit të Përgjithshëm të Ushtrisë së Jugosllavisë, të shkatërruara gjatë bombardimeve të NATO-s në vitin 1999, kompania investuese “Affinity Partners” kishte planifikuar ndërtimin e një kompleksi banimi dhe biznesi nën markën Trump.
Vuçiq tha se, për shkak të asaj që e quajti “gjueti shtrigash” ndaj investitorit dhe projektit, Serbia humbi një investim të vlefshëm prej së paku 750 milionë eurosh.
“E humbëm një mundësi të madhe. Sot flitet keq për Serbinë, sepse disa thonë se ky ishte një projekt i keq. Një projekt më i vogël, ose më i dobët, që u realizua me ngut në Shqipëri, ka marrë shumë vëmendje dhe do të ketë publicitet të shkëlqyer, sepse e gjithë familja Trump do ta lavdërojë”, tha Vuçiq, duke iu referuar planit të Kushnerit për investime në Ishullin e Sazanit në Shqipëri.
“Sikur disa popuj t’i kuptojnë më mirë vendimet e udhëheqësve të tyre sesa populli ynë, ose një pjesë e opozitës sonë politike – e gatshme të veprojë kundër interesave të vendit të vet”, shtoi Vuçiq.
Projektit në Serbi i janë kundërvënë protestuesit antiqeveritarë, opozita dhe ekspertët, të cilët mbështesin ruajtjen e statusit të monumentit kulturor dhe rindërtimin e ish-godinës së Shtabit të Përgjithshëm.
Njoftimi për tërheqjen e kompanisë së Kushnerit u publikua më 15 dhjetor, në ditën kur Prokuroria për Krim të Organizuar në Serbi ngriti aktakuzë ndaj ministrit serb të Kulturës, Nikolla Selakoviç, për shkelje ligjore gjatë heqjes së statusit të monumentit kulturor të ndërtesës së Shtabit të Përgjithshëm.
“Meqë projektet e mëdha duhet të bashkojnë e jo të ndajnë, dhe nga respekti për qytetarët e Serbisë dhe të Beogradit, ne tërhiqemi nga aplikimi ynë dhe këtë herë qëndrojmë mënjanë”, deklaroi një zëdhënës i kompanisë private investuese të Kushnerit, “Affinity Partners”, sipas gazetës Wall Street Journal.
Vuçiq fajësoi Prokurorinë dhe “bllokuesit” – siç i quan ai protestuesit antiqeveritarë që prej më shumë se një viti protestojnë kundër Qeverisë së udhëhequr nga Partia Përparimtare Serbe.
“Personalisht do të kujdesem që të gjithë ata që kanë kontribuar në shkaktimin e këtij dëmi të mbajnë përgjegjësi”, tha presidenti serb.
Ai paralajmëroi se do të “paraqesë personalisht kallëzime penale” kundër “të gjithë atyre që morën pjesë në gjuetinë e shtrigave dhe në shkatërrimin e investimit”, duke i akuzuar për “dëm ekonomik ndaj Serbisë”.
Vuçiq i hodhi poshtë akuzat për korrupsion në këtë projekt.
“Nuk ka pasur kurrë korrupsion, as nuk ka qenë qëllimi i tij”, tha ai.
Kompania e Kushnerit nuk iu përgjigj kërkesës së Radios Evropa e Lirë për koment, pas lajmit për tërheqjen nga projekti.
