Ndërmarrja Publike “Tetova Transport” ka njoftuar zyrtarisht nisjen e një epoke të re në shërbimin e transportit publik në qytet. Përmes një sistemi të avancuar digjital, udhëtarët tashmë do të përdorin QR kodet dhe kartelat RFID, duke shmangur metodat e vjetra të pagesës.
Siç transmeton KohaNews, ky hap synon rritjen e efikasitetit dhe thjeshtimin e lëvizjes për qytetarët e Tetovës, ku gjithçka do të menaxhohet përmes aplikacionit “TE KLIK”.
Kategoritë e reja dhe transporti falas
Sistemi i ri është ndarë në tri kategori kryesore, duke ofruar lehtësime të veçanta për grupe të caktuara:
Kategoria I:Përfshin transportin falas për të gjithë qytetarët që kanë shlyer obligimet e tyre ndaj Komunës së Tetovës, duke nxitur kështu përgjegjshmërinë qytetare.
Kategoria J: Bileta të dedikuara posaçërisht për nxënësit e shkollave fillore dhe të mesme.
Kategoria K:Shërbime për institucione dhe shoqata që kanë marrëveshje paraprake bashkëpunimi.
Pezullohen kategoritë e vjetra
NP “Tetova Transport” bën të ditur se me vënien në punë të këtij sistemi, të gjitha kategoritë dhe mënyrat e vjetra të udhëtimit pezullohen menjëherë. Qytetarët udhëzohen që të regjistrohen sa më parë në platformën zyrtare app.tetova.gov.mk për të siguruar qasjen në shërbim.
Ky investim në teknologji pritet të reduktojë pritjet dhe të ofrojë një pasqyrë më të qartë mbi fluksin e udhëtarëve në rrugët e qytetit./Kohanews
